រដ្ឋមន្ត្រីសង្គមកិច្ចជឿថា នាយករដ្ឋមន្ត្រី ហ៊ុន ម៉ាណែត ពិតជាធ្វើឱ្យកម្ពុជាកាន់តែមានសុខសន្ដិភាព និងការអភិវឌ្ឍ
ភ្នំពេញ៖ រដ្ឋមន្ត្រីសង្គមកិច្ចដែលទើបនឹងចូលកាន់តំណែងនៅថ្ងៃទី២២ ខែសីហា នេះលោក ជា សុមេធី បានបង្ហាញនូវការជឿជាក់ថារដ្ឋាភិបាលដែលដឹកនាំដោយលោកកិត្តិទេសាភិបាលបណ្ឌិត ហ៊ុន ម៉ាណែត ពិតជាធ្វើមាតុភូមិកម្ពុជាកាន់តែមានសន្ដិសុខ ស្ថិរភាព វិបុលភាព និងការអភិវឌ្ឍលើគ្រប់វិស័យ។
ក្នុងលិខិតដែលចុះហត្ថលេខាក្នុងនាមជារដ្ឋមន្ត្រីសង្គមកិច្ចដំបូង នៅថ្ងៃទី២២ ខែសីហា ឆ្នាំ២០២៣ លោក ជា សុមេធី បានលើកឡើងថា៖ «ក្នុងនាមថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ នៃក្រសួងសង្គមកិច្ច អតីតយុទ្ធជន និងយុវនីតិសម្បទា ខ្ញុំមានសេចក្ដីសោមនស្សរីករាយយ៉ាងក្រៃលែង និងសូមអបអរសាទរយ៉ាងស្មោះស្ម័គ្រចំពោះឯកឧត្តមកិត្តិទេសាភិបាលបណ្ឌិត ដែលត្រូវបានរដ្ឋសភានីតិកាលទី៧ បោះឆ្នោតផ្ដល់សេចក្ដីទុកចិត្តធ្វើជានាយករដ្ឋមន្ត្រីនៃព្រះរាជាណាចក្រកម្ពុជា ក្នុងសម័យប្រជុំលើកទី១ និងត្រូវបានព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ត្រាស់បង្គាប់តែងតាំងជានាយករដ្ឋមន្ត្រីនៃព្រះរាជាណាចក្រកម្ពុជា»។
ជាមួយគ្នានេះលោក ជា សុមេធី បានជូនពរលោកកិត្តិទេសាភិបាលបណ្ឌិត នាយករដ្ឋមន្ត្រី ហ៊ុន ម៉ាណែត មានសុខភាពល្អ ប្រាជ្ញាវាងវៃ ដើម្បីបំពេញបេសកកម្មបម្រើជាតិ មាតុភូមិកម្ពុជាផងដែរ៕